Willkommen auf meiner Webseite!

DER BIGGI IHR BLOG

Aldi

Gesdn Nammidouch benn Aldi ô der Kass, hodd sich scho aweng a Schlanga gebilld.
Die Kassiererin woer neu und hodd sich nonnich su richdich ausgekennd. Erschd will a Mô woss umdauschn, dess dauerd.
Dann wolld a Fraa nuch schnell Zigareddn. Dess Madla ô der Kass grichd den Schrong nedd auf, wu die Rauchwoern drinna senn. Ruuda Hoer hoddsa khobbd und genau su a Köbfla grichd sa eds a.
Sie ziechd a boer Hebl, drüggd alla Gnöbfla, obber dess Rollo fährt nedd huch.
Dann sdedd sa auf, gedd nô a annera Kass und drüggd dou aweng rum.
Nix.
Defür kummd eds a Durchsouch:
"Kasse drei hat jetzt für Sie geöffnet."
Alles rennd heggdisch zu Kasse drei und lechd sei Zeuch auf.
Die Kassiererin verlässd ihrn Blods und gedd zerügg.
Soford haasds:
"Kasse drei schließt, bitte nicht mehr auflegen."
Die Leud schimbfm, ramma obber ihra Sachn widder nei die Wäing zerügg.
Dess der Fraa obber a kanner ze Hilf kummd!
Sie brobierd nuch a annera Kass aus und gleich haasds widder:
"Kasse vier hat jetzt für Sie geöffnet."
Leud wu erschd sbäder kumma senn, dränga sich ô uns vorbei und leng ihr Woer aufs Bônd. Obber mir durchschaua dess Sbill und bleim einfoch sdeh.
Mir sänn alles äldera Midbörcher und ich wass nedd wie lang mir die gansa Aufrechung nuch aushaldn, mid die sdändichn Durchsông: "Kasse auf / Kasse zu"
Die Kundin hodd scho lang ougewungn, sie wolled goer kanna Zigareddn mehr und die gansa Schlanga sochd, dess dess a besser für sie und unner Gsundheid wär.
Dou fährd auf amoll dess Rollo hoch und die Fraa grichd ihra Zigareddn.
Und dann fährdes audomadich widder rou.
Endlich senn mir drô und dann sochd meiner woss ve Zigareddnn.

U N D E R S D E H D I C H, houich na ôgfoehrn.

Biggi