Willkommen auf meiner Webseite!

DER BIGGI IHR BLOG

Dess mussda derlebbd homm!

Mir homm unner Audo mid ann Mô gedauschd, der wu unnern Siemsidser fer a boer Douch gebrauchd hodd. Defür hommer ann glaan, schwadsn Obbl grichd und du dengsd, du rudschd midn Oersch über denn Asphald, su niedrich is der.
Middenn Audo semmer schnell zenn C&C gfoehrn, eikaafm.
Dord hômmsa folscha Breise im Combuder khobbd, obber meiner is hald a Fuchs, der hoddes gleich gemergd. Bis dess geänderd woer mussdmer hald nuch waddn und wie immer woern merr aweng sbäid drôh.
Er is nuch ôm zouln, dou bi ich midden Einkaufswächela scho draun, neben Audo.
Der Kufferraum gedd gleich auf und ich deng, dess na dess eichendlich nedd bassierd und er hald nedd zugsberrd hodd.
Ich hobb alles eigeloudn, dou kummder und will die Rechnung neis Audo läing, obber er grichd die Dür nedd auf.
"Brobier hald middn Schloss, ohna Fernbedienung".
Es gedd nedd.
Er werd nervös und kummd drodsdem nedd neis Audo.
"Dou läich ich eds die Rüggbong um und du grabblsd nei und machsd ve inna auf", souch ich ze na, wall I C H hädd mich ja gschäimd, wenn mich ahns gsäing hädd.
Er sdelld sich scho aweng ôh, obber endlich isser vorna und lässd mich rei.
Dann geddie Zündung nedd.
Mir homm ka Zeid und weid und breid ka Mensch!
Er fährd mich ôh, wu ich die anner Rechnung venn OBI hie hädd?
Ich deng, scheiß drauf, schau, dess dess Audo fährd, und sich, dess in der Dür Reisebroschbeggde senn, die ich nonnich gsäing hobb.

"Schnell raus, mir senn im folschn Audo".

Dou sdänga zwa gleicha Audo nehm ananner und dou soll merr nedd err wern!

Bis die richdicha Besidserin kumma is, hommer fasd alles aus ihrn Kufferraum widder draun khobbd!

Biggi