Willkommen auf meiner Webseite!

DER BIGGI IHR BLOG

Aangoerzd

Erschd hobbich Bliddse gsäing, dou hou ich nuch gedochd mich foddografierd ahns.
Dann senn dess immer merrer woern und ich hobb gedochd, ich bi aufm
„Ruudn Debbich“.
Sbäider senn dann su lônga, schwarza Fädn vor meina Aang rum geloffn, und dou hou ich mir an Dermin ve mein Dogder gehm lossn.
Der schiggd mich heud nuch soford zenn Aangoerzd.
Freidouch is, dess kho dauern!
Die homm mich werglich a gleich drô genumma, wie sa khörd homm, dessich Bliddse sich.
Erschd is mir woss nei denn ann Aach gedräufld woern, dann mussd ich aweng warddn, und dann is der Herr Dogder kumma.
„Schau´n Sie mal hierhin, mal dorthin, mal nach oben, mal nach unten“.
Debbei blauderder in ahner Duur.
Ich souch goer nix, ich wardd bluß, wall ich na kenn.
Der will mir widder woss verkaafm.
„Alles was ich sehen kann, ist in Ordnung. Aber ich kann nicht in die Pupille hinein sehen. Diese Blitze sehen Sie, wenn kleine Stücke von der Netzhaut abreißen.“
Der Ôrma, deng ich, denn sei Geld langd a hindn und vorna nedd!
Er dudd mer leid und ich bi fasd suweid auf sein Kuhhandl eizegeh, dou machder ann Fehler!
A 3D Undersuchung könned er mir ôbiedn, obber dess Schlimma drô iss, dess dess die Grangnkassa nedd zould.
„Es kostet 80,-€ und leider aber ist diese Erkrankung Ihren Lebensjahren geschuldet.“
Dess hädder nedd soung dörfm:
IHREN LEBENSJAHREN
Der hodd dess gansa Gschäfd selber kabudd gemachd. Dou worrer nedd feinfühlich genuch!
Früher hodder merr scho a boer Marg ausm Greuz geleiert, obber auf mein Alder hodder dou kamoll ôgsbilld.


Biggi