Willkommen auf meiner Webseite!

DER BIGGI IHR BLOG

Der neu Ônzuch

Meiner brauchd bis Samsdouch ann neua Ônzuch.
Heud is Middwoch und velleichd müssmer na ja nuch aweng ändern.
Erschd semmer nein „V“.
Lauder ausgebildeds, ersdglassigs Bersonôhl.
Wie kommer bluß su gscheid sah?
„Dess is alles der gleicha Schnidd“, sochd sie, obwull amoll die Ärmel bis nou die Gnie hänga, und a annersch moll die Gnöbf übern Bauch nedd zu gänga.
Und dann: „Dou homm sa vielleichd die Eddikeddn verdauschd“.
Genau und deshalb semmer gleich gecheüber nein Real.
Dort hodd uns kanner ôgewaafd und fer blöd verkaafd - es woer goer kahns dou.
SELBSTBEDIENUNG
Ich hobb gleich gemergd, dess die Leud (die Kundschafd) einfoch frech is. Die Huusn homm sa zamgemaadschd einfoch under die Saggo drunder.
Dann sich ich, dess mancha Wesdn goer nedd zenn Ônzuch bassn.
Ich woer zer rechdn Zeid ôm rechdn Oerd und konnnd denna ihrn Loudn aweng auframma.
Meiner is nei die Kabina, hodd ôbrobierd, is widder raus, hodd mer die Jaggn übern Ôrm gelechd und ann neua Ônzuch mid nei genumma.
Su langsam is mir dess alles aweng ze vill woern.
Dia verschiedna Musder und Größn, amoll drei- , amoll vierdeilich, dann die Sachn wu mer meiner übern Ôrm gelechd hodd - ehrlich - ich hobb mich nimmer ausgekennd.
Meiner hodd aus seiner Kabina rausgerufm, ich soll nedd dauernd lachn, sondern na den gleichen Ônzuch a Nummer grösser gehm.

Mid meiner Hilfsagdion hobb ich su a Durcharananner gemachd, dess ich zenn Schluß vier Büchl übrich khodd hou.

Mir homm dann bluß a Dôfl Schogglôd kaafd, dia Ônzüch woern einfoch ze billich.


Biggi