Willkommen auf meiner Webseite!

DER BIGGI IHR BLOG

Dermin

Meiner hodd ann Oerzddermin khobbd.
Dou gi ich doch einfoch amoll mid, nedd desser mer hinderher widder wass woss derzilld.
Ich läss na be der Doggdera raus und such an Bargblods.
Wie ich hie kumm, sdedder vor der Sbrechsdundnhilf und disgudierd mid errer.
„Naa, dess wass ich gans genau, ich hobb be euch heud ôm 20. März ann Dermin und ôm 20. Abril hobb ich nuch ann, be ann annern Doggder.“
Sie widder: „Sie homm heud überhabds kann Dermin be uns.“
Er: „Ich wer mir doch nuch die zwa Douch mergn könna, außerdem homm Sa mir doch su ann Zeddl mid hamm gehm, es ledsda Moll.“
Sie schaud nei ihrn Buch: “Sie häddn ôm 8.März an Dermien khobbd, dou senn Sa obber goer nedd khumma.“
Er widder und ze mir her: „Mir homm dess doch heud früh ô der Binnwand in der Küchn gelesn, 20. März, 11:30 Uhr.“
„Dess hosdu mir su vorgelesn, dess sdimmd scho su“, hilf ich na.
Es Weibsbild woer obber a ze schnibbisch.
Obber mir dorfdn dann nein Wardezimmer – mid Geduld, hoddsa gsochd.
Nouch der Undersuchung bi ich nuch amoll hie ze der Sbrechsdundnhilf und hobb midd die Fingergnöchela auf die Dhegn geglobfd.
„Wenn mir dahamm senn, schau ich soford nouch, dess könna Sa mir glaam. Und dann ruf ich Sa ô!“
„Dess dörfm Sa“, souchd sa und grinsd.

Dahamm senn mir soford nei die Küchn und dord hängder, der Zeddl ve der Braxis.
Und woss sdedd drauf?
20. März 11:30 Uhr

Meiner hodd obber scho die Brilln auf und liesdes mir vor:
20. März 11:30 Uhr.
Und gans leis sochder:

2017

Su a Sausdoll obber a!
Denn Derminzeddl fern 8. März hommer dann nuch im Audo gfunna, obber in
der Braxis hobbich dann nimmer ôgerufm!

Biggi