Willkommen auf meiner Webseite!

DER BIGGI IHR BLOG

Bandônsôch

Ôm Mondouch ruf ich be mein Haudoerzd ô, weche an Dermien.
Gedd kanner nôn Delefon, bluß dess Bônd sbrichd, dess ich warddn soll, gleich senn sa fer mich dou.
Nadürlich wardd ich.
Dann kummd aweng a Mussig, dann hasds, dess ich gleich verbundn werd.
Hindn nouch widder Mussig.
Inzwischn summ ich dess Lied scho mied.
Edds bi ich su schlau und lech dess Händy aufn Diesch und mach denn Laudsbrecher ô.
Wenn dess Bônd durch is, fängds widder ve vorna ô.
Dess woer der Mondouch.
Der Dinsdouch, Middwoch, Donnerschdouch - nedd annerschd.
Ich wolld enna scho an Brief schreim, dou gedd ôm Freidouch a Fraa nô.
Dess hodd mich su derschreggd, dess ich mei Kaffeehäffela nougschmissn hou, wu groud in meiner Händ woer.
Langsam hobbich ja nimmer gedôchd, dess in derrer Braxis Menschn ärbern.
Dann frouchd sa, wie ich haasn däid, ob ich scho moll be enna woer und mei Gebordsdadum wolld sa houm.
Es dauerd aweng, dann sochd sa, Midde Februar, im näxdn Joher könned ich amoll kumma.
VIERAHALB Monad sbäder!
Ich khô goer nix drauf soung.
Dann mahnd sa, dess ich hald vorher ze mein Hausoerzd geh könned, die erzilln a ofd rechd guda Ergebnisse.
Ja, ze wos braung mir Sbezialisdn, wenn der Hausoerzd „a rechd guda Ergebnisse erzilld“?
Ich woer wie vorn Kubf gsdußn.

Dann hobb ich mein aldn Dogder ôgerufm.
Dou woer dann dess Bônd drou, dess heud khans dou is.

Hoffendlich überleb ich dess!!!

Biggi