Willkommen auf meiner Webseite!

DER BIGGI IHR BLOG

Dheader in Bamberch

Ich woer mid unnern Jüngsdn in Bamberch im Dheader.
"Der Riss durch die Welt".
Vorher mussd der Bu nuch an Schnelldesd machn, gleich in der Näh ve derrer Verônsdaldung.
Delefonisch ôgemeldt woer er scho, und auf 18:25 besdelld.
Dord eigedroffm senn mer aweng sbäider.
Hodd a kanner woss gsochd, obber dann mussd mer auf dess Ergebnis warddn und dann is drodsdem widder aweng eng woern, mid der Zeid.
Bis die alles kondrollierd homm, unnera Desdergebnisse, die Eindriddskardn...
Der Bu mussd eds schnell nuch auf´s Glou, ahner löffd uns nouch und sochd, dess ich denn Ruggsogg ô der Garderoub ôbgehm müssed.
Mei Glaaner sochd: "Du wengsdns es Geld raus", nimmd mei Bordmonäi und gidd die Drebbn nou.
Die Gardrobm Fraa sochd, sie griched 1,50€, ich souch, sie müssed nuch aweng wardn, wall mei Bu midn Geld aufn Glou is.
Middlerweiln hodds zenn driddn moll denn Gong gschloung. Ich laaf hie und her, immer bis zer Drebbm ve die "Sanidäern Ônlông" - mei Bu kummd nedd rauf!
Weche denn Corona is überoll Einbohnstrossn Verkehr.
Middlerweiln kümmern sich vier Leud um mich, ahner löffd zwamoll nunder zu die Doileddn - mei Bu blebbd verschwundn.
Die machn überoll scho die Dürn zu, obber ahner sochd ze mir:
"Keine Angst, wir fangen nicht ohne Sie an".

Also, dess hobb ich scho amoll khörd, obber in an annern Dheader.

Dann rufd er die Regie ô, dess sa sbäider ôfanga solln.
Weche denn Einbohnstrôssn Sysdem konnd mei Bu goer nedd mehr ô mir vorbei kumma und sidsd die gansa Zeid scho auf sein Blodds und dengd, woss ner die MUDDER widder drebbd?
Es hodd dem Bersonôhl wull alles ze lang gedauerd und die wolldn ja a erchendwann widder amoll hamm, also dorfd ich mein Ruggsogg ohna Geld ôbgehm und drei Leud homm mich in´ Sôhl und ze mein Blodds gführd.
Is überhabbd nedd aufgfalln und alla mussd aufsdeh und mich verbei lossn.

Dess ich nouch der Vorsdellung an Döner gessen und mich dermoßn vullgsäud hou, is obber a annera Geschichd.