Willkommen auf meiner Webseite!

DER BIGGI IHR BLOG

Künsdliche Indelligens KI

Ich hobb mer a Bäggla venn „bon brix“ schiggn lossen.
Demidd Meiner nedd sichd wie ich dess Geld venn Fensder naus hau, hobbichs nei die "Jed Dangsdell" in der Ruggdeschl Stross liefern lossn und wollds dord ah ouhulln. Ôm Mondouch kummd a Imehl, dess dess Baged ô khumma is und ich solled ann Ausweis mitbrenga, wall sa mich ja nedd khenna.
Diensdouch bi ich hie und dord hommsa mei Besdellung nedd gfunna.
Kho ja moll bassiern, soch ich ze der Midarbeiderin ve derrer Dangsdell und ich kämed moing widder.
Denn nächsdn Douch, dess Gleicha. Die gleicha Dangsdell, die gleicha Fraa und immer nuch kha Baged.
Dahamm brobier ich´s mid der Sendeverfolgung.
Edds bi ich bei „Hermes“.
Alles gans brofessionell, obber dou hör ich ah weider nix wie, dess die Sendung seid Mondouch in der Dangsdell auf mich wardt.
Wie sich die KI (Künstliche Intelligenz) eischald, deng ich, edds hommers! Obber mir senn midananner einfoch nedd gloer khumma. Die hodd sich dauernd widerhold und gsochd, dess dess Baged in der Dangsdell lieched.
Ich hobb gleich gemergd, dess die Indelligens einfoch bluß blöd is.
Dann dorfd ich mid ann „Mensch“ sbrechen, der woer obber ah bluß a Maschina, die immer widder des Gleicha gsochd hodd. Immer widder, dess die Besdellung in der "Shell Dangsdell" am Kreuzstah wär.
Dou hobb ich mei Woer in die verkherda Sdross schiggn lossn, obber Dangsdell woer scho richdig.

Ve der künsdlichn Indelligens bi ich schwer endäuschd