Willkommen auf meiner Webseite!

DER BIGGI IHR BLOG

27,71€

Dess hobbich mir su schö vorgsdelld, ve meina Gschichdn a Buch schreim und dess dann veröffendlichn.
Alles kha Broblem und is ah gans leichd ganga, bis ich versuchd hobb dess mid dem Läiaud hiezegrieng. Das woer villeichd a Gaudi.
Ich bi su mudderseeln allah gwesn, khanner khonnd mir helfm, odder wolld dess. Be Amazon mussd ich dausnd Froung beandwordn, weche der Größ, der Farb venn Babier, denn Einbônd, dem Rônd, woss fer Buchsdôhm und vor allem – woss dess dann khosdn solled.
Ich woer aweng überforderd, dauern hommsa mir mein Dexd zerügg gschiggd, bis ich dehinder khumma bi, - es bassd nedd auf a Seidn. Ich hobb gebasdld und gedôh und auf amoll is alles ôhgenumma woern. Ich woer su glügglich, dessich be der Frouch nouchm Geld einfoch 25,89€ neigschriem hobb und gedochd, dess änder ich dann moing.
Nadürlich hobbich es vergessn.
Dann hodder Herr Amazon (odder sei Fraa) nuch die Mehrwertsteuer drauf und edds khosd dess Buch 27,71€.
Es is mir ja su beinlich, obber edds kho ich dess nimmer rüggängich machn.
Dann wolld ahner, dessich na a Exemblar zuschiggn solled.
Edds werdes widder inderessand, wall ich mei Steuernummer raussung muss, mei Bong, mei IBAN und a Rechnung schreim solled, demidd dess Finanzamt wengsdns seina siem Brozend grichd.
Bordo und Verbackung hobbich dann selber gezohld, wall dess dann 19% gewesn wärn und ich keine Ahnung hobb, wie ich dess dann ausrechna hädd müssn. Dess häddmer dann alles vill zelông gedauerd.